Türkmenistanyň Baş prokuraturasy

Çagalygyň goragynda

29.12.2020

Milli Liderimiziň tagallalary bilen durmuşa geçirilýän «Saglyk» Döwlet maksatnamasy her bir raýatyň, şol sanda ýaşlaryň sagdyn bedenli bolmaklary üçin ähli şertleri üpjün edýär.

Häzirki döwürde dünýäde we sebitde durnuksyz epidemiologik ýagdaýlaryň dowam edýändigini nazarda tutup, ýiti ýokanç keseliň biziň ýurdumyza aralaşmagynyň öňüni almak maksady bilen anyk çäreler durmuşa geçirilýär. Ýurdumyzyň umumy bilim berýän orta mekdeplerinde we mekdebe çenli çagalar edaralarynda alnyp barylýan işler giň gerime eýe bolýar. Has takygy, mekdebe çenli çagalar edaralarynda we orta mekdeplerde zyýansyzlandyryş çäreleri alnyp barylýar we şolara laýyklykda utgaşdyrylan işler geçirilýär.

Bilim ojaklarynda hormatly Prezidentimiziň «Türkmenistanyň dermanlyk ösümlikleri» atly ajaýyp eserinde öz beýanyny tapan, müň bir derdiň dermany bolan üzärlik gündelik ulanylýar.

Çaga keselleriniň öňüni almak, duýdurmak, olaryň arasynda ýüze çykýan keselleri öz wagtynda bejermek, zerur bolan derman serişdeleriniň üpjün edilmegi bilen bagly ýüze çykyp biljek kanun bozulmalaryň öňüni almak, kämillik ýaşyna ýetmedikler we ýaşlar hakyndaky kanunçylygyň talaplarynyň berjaý edilişine gözegçiligi amala aşyrmak boýunça ýurdumyzyň prokuratura edaralary tarapyndan degişli işler alnyp barylýar.

Çaganyň hukuklarynyň, azatlyklarynyň we kanuny bähbitleriniň goralmagy çygryndaky döwlet syýasatynyň durmuşa geçirilmegi, hukuk, durmuş, ykdysady we guramaçylyk esaslaryny kesgitleýän täze kanunlaryň kabul edilmegi we olary milli ýörelgelere, halkara hukugynyň umumy ykrar edilen kadalaryna laýyk getirmek boýunça ähmiýetli işleriň durmuşa geçirilmegi raýatlaryň hukuklarynyň pugta goraglylygyny üpjün etmekde möhümdir.

Halkymyzyň eşretli durmuşda ýaşamagy, ýaşlaryň döwrebap bilim almaklary, sport bilen meşgullanmaklary, wagtlaryny şadyýan geçirmekleri üçin giň mümkinçilikleri döredip berýän milli Liderimiziň jany sag, ömri uzak bolsun, il-ýurt bähbitli işleri rowaçlyklara beslensin.

Berdinazar HUDAÝNAZAROW, Akdepe etrabynyň prokurorynyň tälim alyjy kömekçisi.