Eziz Watanymyz  Berkarar döwletimiziň bagtyýarlyk döwründe ösüşiň belent sepgitlerini nazarlap öňe barýar. Gahryman
Arkadagymyzyň tagallasy bilen 2021-nji ýyl «Türkmenistan — parahatçylygyň we ynanyşmagyň Watany» ýyly diýlip yglan edildi. Bedew bady bilen öňe batly gadamlar urýan mähriban Watanymyzyň  her bir güni taryhy wakalara beslenýär.

2021-nji ýylyň 12-nji fewralynda hormatly Prezidentimiz Gurbanguly Berdimuhamedow ýurdumyzyň Ministrler Kabinetiniň giňişleýin mejlisini geçirdi. Onda Hökümetiň 2020-nji ýylda hem-de şu ýylyň ýanwar aýynda ýerine ýetiren işleriniň netijelerine garaldy. Mejlisde ýene bir şatlykly habar yglan edildi. Ýagny, 2020-nji ýylyň başynda ýylyň jemleri boýunça ýurdumyzda durmuş-ykdysady we medeni görkezijileri babatda iň ýokary netijeleri gazanan etraplary we etrap hukukly şäherleri kesgitlemek maksady bilen, yglan edilen bäsleşigiň jemi jemlendi. Netijede iň gowy etrap diýlip, Daşoguz welaýatynyň S.A.Nyýazow adyndaky etraby saýlanyldy. Gahryman Arkadagymyzyň bu etrabyň häkimligini ABŞ-nyň 1 million dollary möçberindäki pul baýragy bilen sylaglamak hakynda degişli resminama gol çekmegi bizi şatlandyrdy.

Bu hoş habar ähli etrabyň ýaşaýjylarynyň göwün guşlaryny ganatlandyrdy. Şeýlelikde, Oba milli maksatnamasyny durmuşa geçirmek boýunça görkezijiler, pagtanyň, bugdaýyň öndürilişini mundan beýläk-de artdyrmak barada, şertnamalaýyn borçnamalary ak ýürekden ýerine ýetirmek barada, daýhanlaryň öňünde uly borjuň durandygyna dogry düşünen etrabymyzyň ýaşaýjylary, zähmet öndürijiligini mundan beýläk-de artdyrmak üçin öz öňlerinde uly wezipäni goýdular. Etrabymyzda gurluşyk işleri giňden ýaýbaňlanýar. Ilatyň ýaşaýyş derejesi ýylyň-ýylyna ýokarlanýar. Ilata hyzmat ediş derejeleri hem artdyrylýar. Gurulýan çagalar bagynyň, mekdepleriň, sport we saglygy goraýyş desgalaryň sany artýar. Ilatyň iş bilen üpjünçiligi ýokarlanýar.

Milli Liderimiziň Daşoguz welaýatynyň S.A.Nyýazow adyndaky etrabyna beren Şa serpaýy mundan beýläk-de hyjuwly zähmetimize badalga berer. Etrabyň agzybir, zähmetsöýer halky Gahryman Arkadagymyzyň daşynda mäkäm jebisleşip, zähmet öndürijiligini has-da artdyryp, şanly Garaşsyzlygymyzyň 30 ýyllyk toýuna mynasyp goşandy bilen barmaga ruhlandy.

Goý, hormatly Prezidentimiziň jany sag, ömri uzak bolsun, alyp barýan il ähmiýetli, ýurt bähbitli işleri elmydama rowaçlyga beslensin!

Bibigül ÝAGŞYMÄDOWA, S.A.Nyýazow adyndaky etrabynyň prokurorynyň uly kömekçisi, 1-nji derejeli ýurist.